اسلام آباد:(ویب ڈیسک) وفاقی وزیر خزانہ شوکت ترین کا کہنا ہے کہ آئی ایم ایف کے پاس بڑا جامع منصوبہ لیکر جا رہے ہیں۔
معاون خصوصی فرخ حبیب کے ہمراہ پریس کانفرنس کرتے ہوئے شوکت ترین کا کہنا تھا اس وقت پیٹرولیم لیوی دو ڈھائی روپے ہے، ہم نے پیٹرولیم لیوی کے لیے 600 ارب روپے رکھے ہیں لیکن ہم نے نہیں لگائی ہے کیونکہ وزیراعظم نے لیوی لگانے سے منع کیا ہے۔
پیٹرولیم مصوعات کی قیمتوں میں اضافے کے حوالے سے بات کرتے ہوئے وفاقی وزیر کا کہنا تھا خطےمیں پیٹرولیم مصنوعات کی قیمتوں میں پاکستان 17 ویں نمبر پر ہے، دیگر ملکوں کے مقابلے میں پاکستان میں پیٹرولیم مصنوعات کی قیتمیں اب بھی کم ہیں۔
ان کا کہنا تھا کورونا نے ہمیں متاثر کیا ہے، ہم زرعی ملک ہونے کے باوجود فوڈ امپورٹر بن گئے ہیں، ہم گھی، چینی اور دالیں درآمد کر رہے ہیں، زراعت بڑھانے کے اقدامات کر رہے ہیں۔
شوکت ترین کا کہنا تھا عمران خان عوام پر بوجھ میں کمی لانا چاہتے ہیں، ہم لوگوں کو مچھلی نہیں دیں گے، مچھلی پکڑنا سکھائیں گے۔
انہوں نے کہا کہ غریب طبقے کو براہ راست سبسڈی دیں گے، ساڑھے 12 ملین گھرانوں کو براہ راست فوڈ سبسڈی دی جائے گی، ملک کی 40 فیصد آبادی اس سبسڈی سے فائدہ اٹھا سکے گی۔
ان کا کہنا تھا کہ مڈل مین بہت زیادہ منافع کماتا ہے جسے کنٹرول کرنے کے لیے پرائس مجسٹریٹ کے عہدے کو دوبارہ سے بحال کیا جا رہا ہے، منہگائی کم کرنے کے لیے انتظامی ایکشن لیے جائیں گے۔
ڈالر کی قدر میں اضافے کے حوالے سے بات کرتے ہوئے وفاقی وزیر خزانہ کا کہنا تھا کہ روپے کی قیمت میں کمی سے قرضوں میں اضافہ ہوا ہے، پچھلے سال قرض کی جی ڈی پی شرح 4 سے 5 فیصد کم ہوئی ہے۔
