اسلام آباد: پاکستان کی نگراں وفاقی حکومت نے گندم کی درآمد پر پابندی عائد کرنے کا فیصلہ کیا ہے۔
ذرائع کے مطابق اقتصادی رابطہ کمیٹی (ای سی سی) نے گندم کی ریاستی سطح پر درآمد پر پابندی لگانے کا فیصلہ کیا کیونکہ پاکستان میں آٹے کی قیمتیں مستحکم ہیں اور ملک کے پاس کافی ذخائر موجود ہیں۔
حکومت کے اندر ذرائع نے انکشاف کیا ہے کہ پاکستان کے پاس ملک کی ضروریات کو پورا کرنے کے لیے وافر مقدار میں گندم موجود ہے۔
یہ فیصلہ وزارت نیشنل فوڈ سیکیورٹی کی جانب سے ای سی سی کو گندم کی فراہمی پر بریفنگ کے بعد کیا گیا جبکہ کمیٹی نے اس سلسلے میں وزارت کے اقدامات کو سراہا۔
گزشتہ روز کابینہ کی اقتصادی رابطہ کمیٹی نے وفاقی تعلیم اور پیشہ ورانہ تربیت کے لیے 7.15 ارب روپے کی ٹیکنیکل سپلیمنٹری گرانٹ کی منظوری دی۔
یہ منظوری آج اسلام آباد میں وزیر خزانہ، محصولات اور اقتصادی امور ڈاکٹر شمشاد اختر کی زیر صدارت اقتصادی رابطہ کمیٹی کے اجلاس میں دی گئی۔
اقتصادی رابطہ کمیٹی نے ساتویں آبادی اور خانہ شماری کے لیے چار ارب روپے کی ٹیکنیکل سپلیمنٹری گرانٹ کی بھی منظوری دی۔
ای سی سی نے جاپانی گرانٹ کے تحت خیبرپختونخوا میں سیلاب سے تباہ شدہ دیہی سڑکوں کی بحالی اور لاہور میں پینے کے صاف پانی کی فراہمی کے لیے تکنیکی ضمنی گرانٹ کی بھی منظوری دی۔
کمیٹی نے گلگت بلتستان میں سبسڈی والی گندم کی قیمت کو درست کرنے کے جامع پائیدار پلان کے حوالے سے سمری کی توثیق کی۔
اس نے سرورز کی خریداری اور اس مقصد کے لیے کنسلٹنٹس کی خدمات حاصل کرنے کے لیے 1591.624 ملین روپے کے اضافی فنڈز کی بھی منظوری دی۔
اقتصادی رابطہ کمیٹی نے وزارت ہوا بازی کے لیے 500 ملین روپے کی ٹیکنیکل سپلیمنٹری گرانٹ مختص کرنے کی بھی منظوری دی۔
