سڈنی:(ویب ڈیسک) آسٹریلیا کے ایک ہوٹل میں قرنطینہ کے دن گن گن کر گزارنے والے قومی ٹیم کے سابق کپتان وسیم اکرم نے بیگم کی دھمکی کے بعد مونچھیں تو صاف کرلیں لیکن پھر جو روپ نکلا وہ سب کے لیے حیران کن تھا۔
اپنے دور کے مایہ ناز فاسٹ باؤلر وسیم اکرم اپنی اہلیہ سے ملنے آسٹریلیا گئے ہیں لیکن اس سے قبل انھیں ہوٹل میں کم از کم دو ہفتے قرنطینہ کرنا ہوگا جو انھیں اپنی زندگی کے سب سے بور ترین دن لگ رہے ہیں۔
قرنطینہ کے دوران وسیم اکرم کی مونچھیں نکل آئیں جس کی تصویر اسٹار کرکٹر نے سماجی رابطے کی ویب سائٹ پر شیئر کی تو مداح نے خوشی کا اظہار کیا لیکن ان کی آسٹریلوی بیگم کو مونچھیں بالکل نہ بھائیں اور سوشل میڈیا پر بیان داغ دیا کہ ان مونچھوں کے ساتھ گھر مت آنا۔
وسیم اکرم نے تابعدار شوہر کا ثبوت دیتے ہوئے ایک اور تصویر شیئر کی جس میں اُن کی مونچھیں غائب ہیں۔ وسیم اکرم نے کیپشن میں لکھا کہ آخرکار ریزر مل ہی گیا۔ لیکن بات صرف اتنی ہی نہیں تھی۔ وسیم اکرم تصویر میں سامنے سے آدھے گنجے بھی نظر آرہے ہیں اور بچے کچھے بال سفید ہوگئے ہیں۔
Me after 12 days in quarantine 😂😂😂 and I finally found my razor 🪒 happy now ? #QuarantineLife pic.twitter.com/uISKfE26Wi
— Wasim Akram (@wasimakramlive) August 31, 2021
سابق کپتان نے اسی پر بس نہیں کی بلکہ ایک اور تصویر بھی شیئر کی جس میں وہ آدھے گنجے ہیں اور ان کے مونچھیں داڑھی بھی ہیں اور وہ سفید بالوں کی وجہ سے بوڑھے نظر آرہے ہیں۔
دراصل سابق کپتان نے قرنطینہ کے دوران خود کو مصروف رکھنے کے لیے شغل ڈھونڈ لیا ہے اس لیے وہ ایک ایک دن گن کر گزار رہے ہیں اور ہر دن ایک نیا روپ دھار لیتے ہیں۔
